繼續日本山區遊（第九天）
原本諗住喺別府留兩晚，為咗唔使走回頭路，琴晚決定今晚改為喺日田（一個非常細嘅小鎮）過夜，聽日返福岡，就可以慳返個幾鐘頭時間。
喺酒店食完早餐就去九重夢大橋，呢一條係日本最長嘅人行橋。
跟住我哋預約咗去參觀地熱發電廠，以為只可以喺出面睇下，原來最尾都可以入去發電廠內參觀。
話說午餐時份去到一個叫小田町嘅地方，點知所有舖頭都冇開，唯一一間食肆需要等個半鐘頭先有位，所以我哋就決定去另一個地方食午飯，去食鐵板牛扒餐。
之後去咗參觀一個水壩，呢度仲擺咗動漫進擊之巨人嘅場景。
跟住我哋就返去日田町，冇特別嘢做就係市內參觀，晚餐就去咗一間當地嘅餐廳，大眾食堂晚餐。
食完晚飯仲去咗行藥妝店。
