富良野睇花田（第六日）
一早起身喺酒店食早餐，酒店貴少少，早餐都好啲。
之後出發去三笠市，參觀鐵路博物館，相信呢個唔係一個大眾化旅遊景點，因為裏面都冇英文，但係由小樽揸去富良野，係呢度中間停一停，休息下，參觀係最好。
再喺當地小店食午餐，總會有驚喜（而家嚟日本，開始鍾意去當地小店食飯，唔洗話一定要食啲乜嘢，最好就係無遊客到，可以真心體驗一下當地人平時係食啲乜）。由於天氣好熱，食完仲要喺附近便利店買雪糕食。
之後去富良野，第一時間去睇花田，雖然已經到五月尾，但係啲花都仲未盛開，叫做睇到。
之後去咗一間玻璃工場，見識到一隻新款玻璃杯，佢會有燒製中天然嘅裂紋，佢中間嗰層會隨著時間而裂紋增加，咁難得當然要買返隻，但係真係幾貴。
去到富良野市，真係一個好鄉下嘅地方，今晚食shabu shabu，又係當地小店，話說六點鐘去到，walk in雖然有位，但只可以食一個鐘，因為之後已經畀人book曬，不過真係又平又好味。
食完晚飯，例行公事，去便利店買甜品食。
