行程緊湊到釧路（第九日）
先係酒店食早餐，之後出發去芝櫻公園，一個完全粉紅色嘅世界，雖然我哋都係過咗最滿開嘅時間，但係山上仍然有一半都係全粉紅色，如果滿開一定好震撼。
之後一路沿山路行車，見到個觀景台就落去睇下，一落車就發現有個熊出沒注意通告，仲要係4月26號出，即刻週圍望下。
之後再去硫磺山，可以超近距離睇到噴出嚟嘅白煙，佢雖然整咗圍欄，但係我哋發現有啲白煙噴出嘅地方，係喺圍欄出面。
話說泊車入流黃山要畀500yen，職員話畀我哋知可以去埋睇另外一個湖，之前我哋都冇諗住會去，既然畀咗錢就當然去睇下，之後發現原來呢個係日本第一湖景，天朗氣清，風平浪靜，湖水就好似一塊鏡，真心覺得好彩有嚟到睇，真係好靚。
之後再去食午餐，點知去到發現餐廳係不定休日，冇開，已經好肚餓，左搵右搵去最近嘅餐廳，一個車站旁嘅小店，係一間新派嘅cafe，有拉麵又有豚肉飯食。
食完之後仲係火車站旁玩埋足湯。
之後再去阿寒湖，愛努族參觀，主打木雕刻。
黃昏返到釧路，去咗一間小店食晚餐，終於食到八角魚。
P.S. 話說晚餐當地小店，是日精選用人手寫，Google translate完全冇用，最後用ai，完全勝利，翻譯得清楚而明，仲講埋邊啲係北海道出名菜式。
